Faime muncha ilusión anunciar que la mio querídisima Eva de L’Osservatorio di Eva y yo volvemos trabayar xuntes nos campus multidisciplinares que dientro del programa “Espardiendo Cultura” va entamar el Conceyu de Xixón nos díes non lectivos escolares d’esta primavera.
Tábamos naguando por volver a topanosy compartir momentos d’aprendizaxe y entusiasmu nestes xornaes que van tar llenes d’arte, ciencia y cultura.
Nesta ocasión vamos dedicales a muyeres científiques de diversos ámbitos y llugares del mundu y a muyeres asturianes que destacaron en distintes disciplines artístiques, deportives y gastronómiques y que nun suelen apaecer nos llibros de testu.
Va ser una oportunidá pistonuda pa conocer muyeres referentes en tol planeta, pero tamién para descubrir muyeres locales, nacíes n’Asturies y que contribuyeron a la hestoria y al progresu de la igualdá na nuesa tierra.
Vamos deprender sobre’l nuestru patrimoniu cultural, vamos esperimentar cola ciencia, vamos espresar la nuestra creatividá al traviés de distintes formes d’arte y tolos díes vamos alleganos a la biblioteca del centru municipal pa viaxar colos llibros a mundos fantásticos y topar hestories maraviyoses, risonderes y emocionantes. Tou ello esfrutando d’un ambiente lúdicu y seguru.
Los campus tán dirixíos a neños y neñes de 4 a 12 años y van realizase los díes 25, 26 y 27 de marzu, 1 y 19 d’abril y 2, 3 y 24 de mayu de 2024 na ludoteca del Centru Municipal d’El Llano n’horariu de 9:00 a 14:00 hores.
Nos próximos díes la Fundación Municipal de Cultura y Educación del Conceyu de Xixón va publicar precios y feches d’inscripción, que va poder faese per díes sueltos. vamos caltenevos informaos.
¡No lo pierdas, les places son limitaes!
